पोखरामा छ्योखोर दुछेन (धर्मचक्र प्रवर्तन महोत्सव)को अवसरमा मोन्लाम कार्यक्रम सम्पन्न

पोखरा, साउन १२ — नेपाल बौद्ध महासंघको आयोजनामा छ्योखोर दुछेन (धर्मचक्र प्रवर्तन महोत्सव)को अवसर पारेर पोखरा महानगरपालिका–१८, भकुण्डेस्थित पाल एवं नाम्ग्याल गोन्पामा आयोजित १४औँ पूजा प्रणिधान (मोन्लम) कार्यक्रम सफलतापूर्वक सम्पन्न भएको छ । विश्व शान्तिको कामनासहित आयोजित दुईदिने कार्यक्रममा ४२औँ साक्य गद्दीधारी, परम श्रद्धेय रत्नवज्र रिन्पोछेबाट उपस्थित श्रद्धालु भक्तजनहरूलाई शरणगमन शील तथा दीर्घायु अभिषेक प्रदान गर्नुभएको थियो ।

पाठपूजा कार्यक्रममा पोखराका विभिन्न गोन्पा लामा धर्मगुरुहरूको व्यापक उपस्थिति रहेको थियो । बिहान ७ बजेदेखि साँझ ५ बजेसम्म सञ्चालन भएको पाठपूजामा महायान बौद्ध परम्पनाअनुसार शरणगमन, बोधिचित्त उत्पाद, प्रज्ञापरामिता हृदय सूत्र, आर्य भद्रचर्या प्रनिधान राजा, आर्य मञ्जुश्री नाम सांगीति, तारा स्तुति आदिको साथै मंगल परिणामनाको पाठ गरिएको थियो । कार्यक्रमका अवसरमा भगवान बुद्धका पवित्र अस्तु धातु (रिङ्सेल) सर्वसाधारणका लागि दर्शनार्थ राखिएको थियो, जसमा हजारौँ श्रद्धालु भक्तजनहरूले दर्शन गरेका थिए ।

 

नेपाल बौद्ध महासंघका अध्यक्ष नुर्बु थुन्डु शेर्पा (गेशे थुप्तेन जिन्पा)ले मोन्लम कार्यक्रमले बौद्ध धर्मको शिक्षालाई व्यापक बनाउन, शान्ति, करुणा र सहिष्णुताको प्रवर्द्धन गर्न तथा जनमानसमा आध्यात्मिक चेतना अभिवृद्धि गर्न महत्वपूर्ण योगदान पुगेको विश्वास व्यक्त गरेका छन् ।

 

Click here for more photos : https://www.facebook.com/share/p/175nGqU2cY/